Joan Pèir Lalana-Casso que se n’anè tau país deus mistèris dens la nueit deu 24 d’aost passat.
Qu’estó lo prumèr capdau de la prumèra escòla Calandreta a Pau, capvath Occitania en 1979.
Abans l’espelida de l’escoleta, qu’avè negociat dab André Labarrère, lo maire de Pau, l’autrei a gratis deus locaus carrèra Montaigne a Pau. Qu’ei eth tanben qui s’i hasó tà que la vila e balhèsse las prumèras subvencions municipaus.
Qu’avè tanlèu l’abòr de 1978, dab l’equipa prumèra dont los membres èran Gilbert e Beatrice Stenier, Joan Jaques Bayle, Puça Hourdebaigt, Ninon Paloumet, Anna Maria Roth (que prègui los qui èi desbrombat de m’excusar) perpensat e hargat lo projècte de la Calandreta Paulina qui alandè las soas pòrtas en genèr de 1980.
Que continuè a crear estructuras occitanistas com Radiu Vivant, ua de las prumèras ràdios libras paulinas. Jamei ne deishè de har tà la lenga occitana de Bearn e d’aulhors.
Que’n sia mercejat en plen e qu’arrés non desbromben aqueth òmi libre e valent.
Sèrgi JAVALOYES
Extrait del reportatge : Les premières Calandretas en Béarn – 50 ans de borbolh occitan / fresques.ina.fr
Podètz agachar lo reportatge en clicar a la fotografia.
