La formacion Dis-parièrs s’acabèt per l’annada 2025-2026 e coma a cada tinada, ne sortiguèt de produccions qu’esperam que faràn mestièr al regentum tot.
Un trabalh gròs foguèt fach per fargar un document sonat «Los sigles per l’acompanhament dels enfants Dis-Parièrs» que permet d’i veire mai clar dins la jungla dels sigles barbars tals coma TFV, TMA, CDAPH, CMPEA, DAR o encara PAOA. Totes los sigles i son definits e recampats dins tres grandas categorias : los sigles dels trebols e autras particularitats, los partenaris e luòcs d’acuèlh e las aisinas de l’educacion nacionala o autre.
Es una tièra qu’es benlèu pas complèta e que podètz enriquir se vos fa besonh. Dins lo dorsièr Estelum d’aquel document, traparetz tanben de documents ligats, coma per exemple de modèls vuèges de GEVA-sco o de PPRE.
De la còla d’ongan, poiretz tanben trapar las autras produccions :
- d’etiquetas de planejament de la jornada amb pictograms per las mairalas e los elementaris
- un tèxte cap a la gestion del temps amb los enfants a besonhs particulars
- un tèxte, « La metamorfòsi d’Aubin » de Raquèl Garcia, que conta l’evolucion d’un enfant disparièr mercé a las adaptacions mesas en plaça en classa.
Chankar Ratiney per la còla Dis-Parièrs