Tot es lèste per aculhir la còla Aprene-1 novèla a Besièrs per las doas primièras setmanas de recampament. D’unes l’auràn segurament remarcat, sèm a sollicitar lo regentum per tal d’aculhir calandrinas e calandrins dins las classas per una descobèrta del mestièr de regent a Calandreta.
Ongan tornamai los 8 calandrins realizaràn un jornal en linha e participaràn a la Nòvaletra aquesta.
A la mesura de la capitada de l’an passat, avèm decidit de contunhar los aprendissatges multinivèls. Aquò fa que las tres còlas de la formacion iniciala se traparàn amassa, siá a Besièrs, siá a Tolosa. Podèm presar lo succès al concors en junh passat, çò que balha una còla bèla en Aprene-3 (professors de las escòlas estagiaris). En tot, seràn 24 personas sul tatami d’Aprene !
Per çò qu’es de la formacion continua dels regents Calandreta, aquí tanben, çò mes en plaça aquestas darrièras annadas dins l’encastre del label qualitat EDUFORM contunha de porgir una programacion 2026-2027 chucosa. La podètz consultar en seguir lo ligam aqueste. Ne podèm grandmercejar los Regents Referents de portar aital mai de quaranta accions de formacion continua.
D’unas formacions, son accessiblas als salariats non ensenhaires del movement. Per exemple, «Literatura de joinessa» dobèrta a las bibliotecàrias, «Sortir e fargar» o encara «Practicar los jòcs tradicionals e esportius» pels animators (entresenhas e inscripcions : secretariat@aprene.org).
E dins la nòstra mission de formacion, solide que lo Camin de lenga-cultura occitana es de mai en mai sus las quatre ròdas amb un engatjament fòrt dels calandrons, dels calandrins e dels regents. E aquò, per nosautres fa sens quand s’agís de far viure l’immersion !
Polida annada escolara a totas e totes.
Amandina Garcia Combes e Xavi FERRE