Lo 17 de setembre de 2026, a Barcelona, Calandreta recebèt lo prèmi Robèrt Lafont de la Generalitat de Catalonha. Aquela distincion ven reconéisser l’engatjament del movement per la transmission de l’occitan e lo trabalh pedagogic menat dins sas escòlas.
Segon Jornalet, la jurada causiguèt Calandreta a l’unanimitat entre quatre candidaturas. Metèt en abans la preséncia del movement dins los territòris, son accion de longa durada per l’ensenhament de la lenga e sa capacitat de mobilizar un collectiu larg.
Creat en 2010, aquel prèmi onora de personas o d’entitats engatjadas per la promocion de l’occitan. La ceremònia del 17 de setembre se debanèt entièrament en occitan.
Per APRENE, aquel omenatge fa tanben resson a una istòria comuna. Robèrt Lafont foguèt lo primièr president de nòstre Conselh Scientific e acompanhèt lo desvolopament de la formacion dels regents. Son implicacion s’espandiguèt tanben a la creacion de l’ISLRF, per la formacion dels mèstres dels malhums immersius.
Dins sa cronica publicada lo 26 de setembre de 2026 dins Midi Libre, Joan-Loís Blenet torna sus la remesa del prèmi e sul camin partejat per Robèrt Lafont e Calandreta.
Per anar mai luènh
Vos convidam a legir aqueles dos articles complementaris :
- Jornalet : l’article de Ferriòl Macip, publicat lo 18 de setembre de 2026.
- Midi Libre : la cronica de Joan-Loís Blenet, publicada lo 26 de setembre de 2026.