La mixitat e la paritat

La mixitat e la paritat son un lagui constant de nòstres mòdes de trabalh cooperatiu, a totes los escalons de nòstra organizacion. Dempuèi 2004 una formacion contunha d’ensenhaires es estada impulsada per APRENE : «egalitat de las astradas». Mirava, a un moment ont aquela tematica emergissiá a pena dins la societat, a amassar ensenhantas e ensenhants a l’entorn d’una reflexion multifòrma en començant per definir e clarificar los tèrmes (egalitat, genre, discriminacions…), puèi en identificant los diferents tipes de discriminacions, los espacis d’accion (escòla, cort, matèrias, estatuts e foncions), e los acompanhaments necessaris al cambiament.

Al congrès de Nimes junh de 2007, una comunicacion en session plenièra a permés de partejar e de debatre d’aquel caminament, que contunha uèi dins las formacions inicialas e la formacion contunha « dis-parièrs ».

Al nivèl de la direccion d’Aprene, una paritat s’obsèrva, e aquel, dempuèi qu’es estat pensat lo passatge d’una direccion a una co-direccion: quatre, puèi sièis co-directors o co-directrises assumisson aquela responsabilitat, e dempuèi 2023, se compta 4 òmes e 2 femnas. L’equipa dels Paissels ajudaires, ela, es totjorn estada formada de faiçon mixta, e las responsabilitats dins son sen an pogut èsser distribuïdas segon lo meteis principi (lo conselh cooperatiu de l’equipa permetent de longa d’afinar e melhorar la situacion tan necessària). Un tal respècte de la mixitat e de la paritat es escrupolosament transmés a nautor dels estagiaris, dins l’organizacion concrèta de lors grops per promocion, e dins los contenguts de lor formacion. Enfin, dins la partida de formacion contunha, un meteis lagui de mixitat es observat. Aiçò illustra a l’encòp un desequilibri encara potent, mas tanben lo lagui qu’avèm de trabalhar los factors de blocatge per l’engatjament de las femnas dins las foncions de direccion : a l’imatge de la societat, nòstra equipa deu probable conéisser un melhorament (estructurala aitant qu’estatistica) d’aquela paritat de genre dins l’accès als diferents nivèls de responsabilitat. Es l’una de las orientacions màgers de nòstra reflexion e de nòstra practica.